Qırımda navigatsiya servisleriniñ, şu cümleden Google Maps-niñ işinde qıyınlıqlar bar, dep bildire Qırımtatar resurs merkezi (QRM), yerli sakinlerge atıf etip.
Berilgen malümatqa köre, Google Maps hızmeti qullanıcılarnı sıq-sıq yañlış yerlerge alıp kete, yañlış marşrutlarnı bere.
"Qırımda navigatsiya şimdi pek yaramay çalışa. Yolnı belgilegeniñizde, navigator sıq-sıq başqa bir yerge alıp kete ya da umumen şaşmalay, — dep haber etile.
Merkezniñ qayd etkenine köre, bunıñ sebebi daa belli degil, amma bu "işğal etilgen topraqlarda yaşağan insanlarnıñ qarşılaşqan daa bir problemasıdır".
"Qırımnıñ işğali şaraitinde bir çoq global hızmetler tehnikiy qıyınlıqlarğa rastkele ya da kirişni mahsus sıñırlay, bu ise yerli sakinlerniñ yaşayış keyfiyetini fenalaştıra. Qırımnıñ dünya tehnologiyalarından umumiy izolâtsiyası fonunda bu problemler tek kerginleşe bile", — dep qoştılar merkezde.
Daa evel haber etilgenine köre, Qırım sakinleri YouTube videohostinginiñ işinde problemlerge rastkeldi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
