Ukraina Yuqarı Radasınıñ İnsan aqları vekâletlisi Lüdmila Denisova, Qırımda ve Donbassta "milliy ve diniy sebepli taqibatnı", qurbanları yanvarniñ 27-sinde añılğan Holokostqa oşattı.
"Holokost - insaniyetniñ tarihında qorqunçlı bir saifedir, ve ondan ders almadan, sadece çevirmek olmaz. Natsiatleniñ rejimi 12 yılnıñ içinde yeudilerni yoq ete edi. Hitler ve tarafdarlarınıñ siyaseti neticesinde 6 millionğa qadar adam öldürildi. Ukrainada bu qorqunçlı künlerni yaşadı. Amma bugün vatandaşlarımız vaqtınca işğal etilgen Donbass topraqlarında ve vaqtınca işğal etilgen Qırım topraqlarında işğalci akimiyetniñ tarafından şeklini deñiştirgen diniy ve milliy sebepli taqibattan horlana", - yazdı Facebookta o.
Ombudsmen, dünyanı birleşmege ve Holokost kibi facialar bir daa tekrarlanmasın dep, bütün küç-quvetini qoymağa çağırta.
2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.
Ukraina Yuqarı Radasınıñ İnsan aqları vekâletlisi Lüdmila Denisova, Rusiye apishanelerinde tutulğan ukrainalı siyasiy mabüslerniñ farqlı sayısı aydınlatqan edi: 113-ten 115-ke qadar, 80-den çoq – qırımtatarıdır. Qırımtatar resurs merkeziniñ cedvelinde 86 qırımlı siyasiy mabüs bar. Qırım aq qorçalayıcı gruppası da aynı raqam aqqında ayta.
Aq qorçalayıcılar ve advokatlar bu cinaiy davalarnı siyasiy, milliy ya da diniy sebeplerden taqip dep adlandıra. Rusiye akimiyeti bu sebeplerni inkâr ete.
