Qırım yarımadasında keskin nefes virus yuqunçı (KNVYU) hastalarınıñ sayısı artqanı içün mektep ve bala bağçaları qısmen karantinge qapatıla, dep bildire Rospotrebnadzornıñ Qırım idaresi.
Müessise malümatına köre, soñki afta içinde Rusiye işğal etken Qırımda qırğınlıq seviyesinden 29,4% çoq oldı.
«2020 senesiniñ 6-ncı aftasında Qırım Cumhuriyetinde ve Aqyar şeerinde keskin nefes virus yuqunçı hastalarınıñ sayısı arta. Qırım yarımadasında (03.02.2020 tarihinden 09.02.2020 tarihine qadar) 9528 insan nefes virus yuqunçına oğradı, 10 biñ/ealige 49,8 ola. Qırğınlıq seviyesine nisbeten hastalıq 29,4%-ğa yüksek», – dep aytıla haberde.
Qayd etilgenine köre, Aqyarda 2181 insan keskin nefes virus yuqunçı oldı, 10 biñ/ealige – 49,8. Böylece, matbuat hızmetiniñ malümatına köre, Aqyarda hastalarnıñ sayısı qırğınlıq seviyesine nisbeten 13,6% ola.
Rospotrebnadzor qayd etkenine köre, keçken afta içinde Qırımda 19 mektepniñ oquv esnası qısmen toqtatıldı, 55 sınıf, 6 mektepten evel müessisede ise 7 gruppa karantinge qapatıldı.
Aqyar şeerinde 17 mektepniñ 43 sınıfı, 3 mektepten evel müessisede 3 gruppa qapatıldı, dep bildire matbuat hızmeti.
Qırım ve Aqyardaki Rospotrebnadzor idaresiniñ bildirgenine köre, 2020 senesiniñ beşinci aftası devamında yarımadada gripp ve keskin nefes virus yuqunçı olğan insanlarnıñ sayısı tez arttı.
Bundan ğayrı, Qırımda keskin nefes virus yuqunçı alâmetlerinen hastahanege alınğan sekiz kişi koronavirus şübhesinen teşkerile.
Daa evel yarımadada bu yıl gripp olacaqlarnıñ sayısı yüksek seviyede olacaq, dep tahmin etildi.
Qırım ve Aqyarda bıltır sentâbr ayında gripp aşıları yapılıp başladı.
