Qırım ve Aqyardaki Rospotrebnadzor idaresi yarımadada maska rejimine riayet etüv eksilgenini qayd ete. Bu aqta fevralniñ 3-nde müessise yolbaşçısı Natalya Penkovskaya COVID-19 ile küreş operativ ştabınıñ toplaşuvında ayttı.
«Soñki eki afta koronavirus hastalarınıñ sayısı eksilgenini qayd etemiz. Amma qırımlılardan erte quvanmamalarını rica etecem. Aytqan raqamlarımız menfiy tesir etti, qırımlılar maska taquv rejimine riayet etmey. Soñki afta köremiz ki, naqliyatta, alış-veriş merkezlerinde ve insanlar toplaşqan yerlerde maska taqqan insanlarnıñ sayısı 20% eksildi», – dedi Penkovskaya.
Keçken künü Qırımda 151 yañı koronavirus hastası qayd etildi.
2020 senesi dekabrniñ başında Rusiye kontrolindeki Qırım yolbaşçısı Sergey Aksenov şeerde ve rayonlarda maska taqılmasını kontrol etmege emir etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
