Rusiye kontrolindeki Qırım Yuqarı mahkemesi Bağçasaraylı faaller Seydamet Mustafayev, Remzi Nemetullayev, Abdulmecit Seytumerov, Amethan Ümerov, Ruslan Asanov ve Eldar Yakubovnıñ apis müddetini uzatmaq muracaatlarını red etti.
"Qırım birdemligi" bildirgeni kibi, olar 2024 senesi iyülniñ 22-ne qadar apiste qalacaq. Bundan evel Aqmescitteki Kıyiv rayon mahkemesi böyle qarar çıqardı.
Advokat Emil Kurbedinovnıñ fikirince, "FSB qırımtatarlarnı tahqiqat izolâtorında özüni ve diger semetdeşlerini qabaatlamaqtan vazgeçkenleri içün tuta. Bundan da ğayrı, imayeniñ şikâyetlerinde Rusiye mahsus hızmetleri ve diger organlarnıñ hadimleriniñ areketleri Jeneva şartnamesiniñ 4-ünci maddesini boza", — dep qayd etile.
"Şimdi siyasiy mabüslerniñ bu gruppası boyunca Cenübiy okrugınıñ arbiy mahkemesinde tahqiqat toplaşuvını ve ilerideki basamağını bekleymiz", — dep ayttı imayeci.
Qırımnıñ Bağçasaray ve Bağçasaray rayonında avgustnıñ 24-nde saba Rusiye quvetçileri qırımtatarlarnıñ — Ruslan Asanov, Seydamet Mustafayev, Ramzi Nemetullayev, Abdгlmecit Seytumerov, Amethan Їmerov ve Eldar Yakubovnıñ evlerinde tintüvler keçirdi, soñra olarnı tutıp, Aqmescitteki RF FSB binasına alıp kettiler. Tutulğanlarnıñ episi Rusiye Federatsiyası Ceza kodeksiniñ 205.5 maddesiniñ birinci qısmına istinaden şübeli sayıla. Söz Rusiyede yasaq etilgen "Hizb ut-Tahrir" teşkilâtı aqqında kete.
Avgustnıñ 25-nde Rusiye kontrolindeki Aqmescitniñ Kıyiv rayon mahkemesi bütün yaqalanğanlarnı eki ayğa SİZO-ğa yolladı. Bu qarar qabul etilgende mahkeme binası yanında mahkeme oturışına kelgen faallerni kütleviy şekilde tuttılar. Umumen 23 tutulğan kişi aqqında belli edi, olarğa Rusiye ordusına hızmet etmek içün celpnameler berildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
