Aprelniñ 4-nde işğal etilgen Qırımda 14 yılğa üküm etilgen «ukrain diversantları davasınıñ» mabüsleri Vladimir Dudka ve Aleksey Bessarabovnıñ advokatları ükümni temyiz etmege azırlanalar.
Bu aqta Vladimir Dudkanıñ advokatı Sergey Legostov Qırım.Aqiqat Radiosınıñ yayınında ayttı.
«Ükümni qanunsız ve sebepsiz sayıp, 10 kün içinde onı temyiz etmege niyetlenemiz… Başqalarğa baqqanda Qırımdaki diversiya davaları boyunca çıqarılğan ükümlerniñ eñ sert soyu bu oldı. Sebebini men aytıp olamayım. Belki, tahqiqat sahtelevini gizlemek içün, belki, mahküm etilgenlerni ve tuvğanlarını qorquzmaq içün, belki, qalğanlarını. 14 yıl – pek büyük ceza», – dedi Legostov.
Rusiye kontrolindeki Aqyar şeer mahkemesi «ukrain diversantları davasınıñ» mabüsleri Vladimir Dudka ve Aleksey Bessarabovnı 14 yılğa üküm etti.
Mahkeme er birine para cezasını da berdi: Dudkağa – 350 biñ ruble, Bessarabovğa – 300 biñ ruble.
Kyivde aprelniñ 4-nde Rusiye elçihanesi ögünde Vladimir Dudkanıñ doğmuş qardaşı Petr Dudka bir kişilik narazılıq aktsiyasını keçirdi.
Aprelniñ 2-nde Aqyar şeer mahkemesiniñ oturışuvında qabaatlayıcı taraf «ukrain diversantları davasınıñ» mabüsi Vladimir Dudka içün 15 yıl apis cezası berilmesini istedi. 4-üni apishanede keçirecek, qalğan – 11 yılnı ise sert rejimli koloniyada. Davanıñ diger mabüsi – Aleksey Bessarabovnı – Rusiye prokuraturası 14 yıl ve 10 ayğa üküm etmege rica etti. Olardan 4 yılnı apishanede, qalğan 10 yıl ve 10 aynı sert rejimli koloniyada keçirmeli.
2016 senesi noyabrniñ 9-nda Aqyarda «Nomos» Qırım analitik merkeziniñ hadimleriDmitriy Ştıblikov, Aleksey Bessarabov ve yaqın dostu Vladimir Dudka tutulğan edi. Üçü de Ukraina istihbaratınıñ isteginen Qırımda diversiya azırlağanında qabaatlandı.
2017 senesi noyabrniñ 16-nda Aqyar şeer mahkemesi Ştıblikovnı 5 yıl sert rejimli koloniyada qalmasına ve 200 biñ ruble (95 biñ ğrıvnâ) para cezasına üküm etti.
2018 senesi iyülniñ 31-nde Kreml kontrolindeki Aqyar şeer mahkemesi aqyarlı Vladimir Dudka ve Aleksey Bessarabovnıñ apis cezasını altı ayğa uzattı.
Ukraina telükesizlik hızmetiniñ bildirgenine köre, Qırımda tutulğan Ukraina vatandaşları SBU hadimleri ya da hızmetçileri degil.
