Kreml kontrolindeki Aqmescitniñ Mirovoy mahkemesi fevralniñ 26-nda «Qırım birdemliginiñ» faali Nuri Abduraşitovğa qırımlı advokat Emil Kurbedinovnıñ davasını baqacaq olğan Aqmescitniñ Kiyev rayon mahkemesiniñ ayatında video çıqarğanı içün para cezasını berdi.
«Qırım birdemliginiñ» birleşmesi bildirgenine köre, faalge 500 ruble para cezası berildi.
Rusiye tahqiqatçıları Kurbedinovnıñ davası baqılacaq mahkeme ayatında video çıqarğan Nuri Abduraşitovğa qarşı memuriy tahqiqat başlatqan edi.
Advokat Kurbedinov 2018 senesi dekabrniñ 6-nda Rusiye uquq qoruyıcıları tarafından tutuldı. Mahkeme onı 2013 senesi Facebookta paylaşqanları içün «ekstremist teşkilâtları timsalleriniñ teşviqatında ya da numayış etilüvinde» qabaatlap 5 künge apiske aldı.
Advokatnıñ fikirince, onıñ dekabrniñ 6-nda Rusiye uquq qoruyıcıları tarafından tutulması «olmaycaq sebeplerden» yapıldı, o, ekstremizm qabaatlarını tanımay. Emil Kurbedinov qayd etkenine köre, tutulmasınıñ kerçek sebebi onıñ aq qorçalayıcı faaliyeti, siyasiy mabüslerge köstergen yardımı ve Ukraina askeri Bogdan Nebılitsanı qorçalağanı ola.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
