Qırımda keçken künü koronavirus yuqunçından daa üç hasta vefat etti. Bu aqta Qırımnıñ Rusiye Sağlıq nazirliginiñ monitoring malümatında aytıla. Müessise malümatına köre, Qırımda COVID-19-dan vefat etkenlerniñ sayısı 99 kişi oldı.
«2660 insan tibbiy közetüv altında buluna, 988-i evde dinamik közetüv altında qala, 1554 kişi hastahanelerde buluna, 118 insan observatorlarğa alındı», – dep aytıla haberde.
Qırımnıñ Rospotrebnadzor idaresi bildirgenine köre, koronavirus pandemiyası ve yarımadada epidemiologik vaziyet umumen fenalaşqanı sebebinden esli-başlı eali arasında vefat etkenlerniñ sayısı arta.
Keçken künü Qırımda 171 koronavirus hastası qayd etildi, bu Qırımda pandemiya başlağanından qayd etilgen eñ büyük raqam.
Qırımda, akimiyetniñ malümatına köre, 6502 yañı koronavirus hastası qayd etildi, 107-si çetelden keldi, 128-i qomşu Rusiyeden kelgenler ve olarnen alâqada olğanlar. 3721 insan tüzeldi. Rusiye Sağlıq nazirliginiñ malümatına köre, 96 insan koronavirustan vefat etti. Aqyarda 1417 insan yañı koronavirus yuqunçına oğradı, 944 kişi tüzeldi, 42 insan vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
