Qırımda avgustnıñ 9-ı sabasında koronavirustan vefat etken 12 insan aqqında haber etile. Avgustnıñ 8-nde qomşu Rusiyeniñ operativ ştabı yarımadada keçken künü COVID-19-dan vefat etken 15 insan aqqında bildirdi.
«Qırım Cumhuriyetinde yañı koronavirus yuqunçı vaziyetiniñ er künlik monitoring malümatına köre, 5460 insan (COVID) ambulator tedaviylevde buluna, 3132 kişi (COVID ve pnevmoniya) hastahanede yata. Qırım Cumhuriyeti ve Aqyar şeerindeki Rospotrebnadzor idaresi 63233 COVID-19 hastası qayd etildi. Tüzelgen 52667 kişi hastahaneden çıqarıldı», – dep aytıla Moskva kontrolindeki Qırım sağlıq nazirliginiñ haberinde.
Qırımda koronavirus hastalarınıñ sayısı kene arttı. Avgustnıñ 7-nde 388 COVID-19 hastası qayd etildi, bugün saba qayd etilgen 391 yañı hasta aqqında belli oldı.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
