Tünevin Qırımda tasdıqlanğan koronavirus hastalığı ile daa bir adam vefat etti. Böylece, COVID-19-dan ölgenlerniñ sayısı 44 adam oldı.
Bunı Rusiye nezaretindeki Qırım Sağlıq Nazirliginiñ matbuat hızmeti bildire.
"Er künlük monitoring malümatına köre, Qırım Cumhuriyetinde tibbiy baqıluv altında 2295 adam bar, olardan 475-i evlerinde dinamik baqıluv altına buluna, 1714-ü hastahanelerde baqıla, 106-sı observatorlarda buluna", - denile beyanatta.
Tünevin Qırım Cumhuriyetinde 78 koronavirus adisesi qayd etildi. 33-ü tibbiy yardım içün muracaat etkende belli oldı, 35-i daa evel hastalanğanlarnen alâqada oldı, 10-u sağlam ealiniñ skriningi neticesinde belli oldı.
Umumen Qırımda, akimiyetniñ malümatına köre, 3 494 yañı koronavirus hastası qayd etildi, 94-ü çetelden keldi, 124-ü qomşu Rusiyeden kelgenler ve olarnen alâqada olğanlar.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
