Keçken künü Qırımda 9 hasta koronavirus yuqunçından öldi, pandemiya başlağanından berli Qırımda COVID-19-dan vefat etkenlerniñ sayısı 492 oldı, dep haber ete Qırımnıñ Rusiye sağlıq nazirligi.
"3318 insan (covid) ambulator tedaviylevde, 2909 kişi (covid ve pnevmoniya) hastahanede buluna, 7 insan observatorlarğa alındı. Umumen 24523 COVID-19 hastası qayd etildi. 19248 kişi tedaviylengen soñ yiberildi", – dep yazıla müessiseniñ haberinde.
Qırımda keçken künü 332 yañı koronavirus hastası qayd etildi, 7-niñ hastalıq alâmetleri yoq, dep bildirdi Qırımnıñ Rusiye başı Sergey Aksönov.
Aksönov, yanvarnıñ ortasına qadar yerli alış-veriş merkezlerinde kütleviy tedbirlerniñ keçirilüvini ve food courtlarnıñ işini yasaqladı. Qırımda tek restoranlarda degil, ofislerde de korporativ keçirilüvi yasaq etildi.
Bundan evel Qırım akimiyeti şeer meydanlarında keçirilmesi planlaştırılğan bütün medeniy-kütleviy tedbirlerni yasaqladı.
Rusiye prezidenti Vladimir Putinniñ emrinen, Rusiye Mudafaa nazirligi Yalta ve Aqmescitte yuqunç ile küreşmek içün koronavirus hastahanelerini qura.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
