Tünevin Qırımda 24 yañı koronavirus hastası qayd etildi, bildire Qırımnıñ Rusiye yolbaşçısı Sergey Aksenov.
"8-i tibbiy yardım içün muracaat etkende belli oldı, 8-i daa evel qayd etilgenlernen alâqada olğanı içün belli oldı, 7-si sağlam insannıñ skriningi neticesinde qayd etildi ve daa 1-isu - Ukrainadan ketirilgen adise, – dep yazdı Aksenov Facebookta.
Yerli akimiyetniñ malümatına köre, Qırımda 1410 yañı koronavirus hastası qayd etildi. 75-i çetelden keldi, 112-si qomşu Rusiyeden kelgenler ve olarnen alâqada olğanlar. 1002 adam yahşı oldı, 16 adam vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
