Qırımda koronavirus yuqunçı sebebinden 2620 insan tibbiy közetüv altında buluna, olardan 2548-i evde dinamik tibbiy közetüv altında qala.
Bu aqta martnıñ 29-nda Qırımnıñ Rusiye sağlıq naziriniñ muavini Anton Lâskovskiy Qırımda koronavirus yuqunçınıñ tarqaluvına qarşı tedbirlerge dair er künlik maruzasında ayttı.
«Müddetniñ başından berli 285 insan közetüvden çıqarıldı. 65 insan hastahanelerde buluna, 10 insan observatorlarğa tecrit etildi. COVID-19 qayd etilgen 15 insandan ekisi orta ağır alda buluna, qalğanları bir qarar ya da hastalıqları alâmetsiz keçe», – dep qayd etti Lâskovskiy.
Qırımnıñ Rusiye yolbaşçısı Sergey Aksenovnıñ bildirgenine köre, martnıñ 29-ı sabasına qadar Qırımda yañı koronavirus hastaları qayd etilmedi.
Hatırlatamız, 2020 senesi martnıñ 28-ne qadar Qırım yarımadasında 20 koronavirus hastası qayd etildi: 15 – Qırımda ve 5 – Aqyarda.
Martnıñ 28-nde Qırımda koronavirus tarqaluvı sebebinden 2414 insan tibbiy közetüv altında buluna.
Qırım ve Aqyardaki Rospotrebnadzor idaresiniñ yolbaşçısı Natalya Penkovskayanıñ bildirgenine köre, Qırımda martnıñ 27-nde saba yedi yañı koronavirus hastası qayd etildi. Böylece hastalanğanlarnıñ sayısı 14 oldı.
Aqyarda ilk beş koronavirus hastası qayd etildi, dep tarif etti martnıñ 27-nde Aqyar Rusiye ükümetiniñ reis vazifelerini vaqtınca eda etken Mihail Razvojayev.
Koronavirus yuqunçınıñ tarqaluvına yol bermemek içün işğal etilgen Qırım ve Aqyarda «yüksek seviyeli azırlıq» rejimi ilân etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
