Qırımda aprelniñ 25-nde saba 1029 insan tibbiy közetüv altında buluna, dep haber ete Qırımnıñ Rusiye ükümetiniñ matbuat hızmeti.
Qayd etilgenine köre, 830 insan (1029-dan) evde dinamik közetüv altında, 85 kişi hastahanede buluna, 114 kişi observatorlarğa alındı.
Qırımdaki Rospotrebnadzor idaresiniñ malümatına köre, 67 COVID-19 koronavirus hastası qayd etildi. Olardan 38 insan tedaviylene, 29-ı tüzelip yahşı oldı.
Qırımnıñ Rusiye yolbaşçısı Sergey Aksenovnıñ bildirgenine köre, aprelniñ 24-nde 10 koronavirus hastası qayd etildi.
Haber etilgenine köre, Aqmescit klinik hastahanesi qayd etilgen koronavirus hastaları sebebinden aprelniñ 24-nden berli qapalı qala.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
