Qırımda aprelniñ 14-nden başlap vatandaşlarnıñ özüni izolâtsiya etüv rejimi sertleştirile. Bu aqta aprelniñ 13-nde Qırımnıñ Rusiye ükümeti yolbaşçısı Yuriy Gotsanük yañı koronavirus yuqunçınıñ tarqaluvına qarşı tedbirler operativ ştabınıñ toplaşuvında bildirdi.
Onıñ aytqanına köre, hadimlerniñ vahta usulı ile ketirilüvi toqtatıla. Sakinlerge mezarlıqlarnı ziyaret etmege de tevsiye etilmey, cenaze hızmetleri ve cenazege baruv istisna olacaq.
«Aprelniñ 30-na qadar 65 yaştan büyük vatandaşlarnıñ, hronik hastalıqları olğan vatandaşlarnıñ ayatı ve sağlığı içün telüke olmasa, yaşağan yerlerini terk etmege yasaq etile. Azıq mallarını almaq, ayvanlarnı çıqarmaq, tibbiy müessisege barmaq içün evden çıqmağa mümkün. İş yerinde bulunması müim olğan teşkilâtlarnıñ hadimlerine bu sıñırlavlar tesir etmey», – dedi Gotsanük.
Aprelniñ 12-nde Qırımda 31 koronavirus hastası bar edi. 2973 insan közetüv altında bulundı. Aqyarda altı insan hastalandı, dördü tüzeldi.
Qırımda özüni izolâtsiya etüv rejimi aprelniñ 30-na qadar, Aqyarda ise aprelniñ 19-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
