Qırımda bir künniñ içinde yarımadağa kelgen 30 adamnı observatorlarğa yolladılar. Bunı er künlük brifingde Qırım ve Aqyardaki Rospotrebnadzor idaresiniñ yolbaşçı muavini Dmitriy Krutikov haber etti.
"21 adam Qırım şimalinde sıñırnı keçti, bir adam ava limanında, daa beşi poyezdnen keldi ve bir adam qırım köründen keçip keldi", - dedi Rospotrebnadzor vekili.
Tünevin Qırım başı Sergey Aksönov, çetelden kelgen qırımlılar observatorda bulunğanı içün tölemeli dep bildirdi. Rusiyeden Qırımğa kelgenlernen aynı vaziyet.
Qırımda 355 koronavirus hastası qayd etildi. 26-sı çetelden, 74-ü – qomşu Rusiyeden keldi. 11 koronavirus hastası vefat etti. Aqyarda – 153 hasta, üçü vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
