Rusiye kontrolindeki işğal etilgen Qırım yolbaşçısı Sergey Aksenov yarımadada qayd etilgen koronavirus hastalarınıñ rekord sayısı aqqında bildirdi – bir künde 55 kişi.
«Avgustnıñ 20-nde Qırım Cumhuriyetinde 55 koronavirus hastası qayd etildi. 25-i tibbiy yardım içün muracaat etkende belli oldı, 19-ı daa evel qayd etilgen hastalarnen alâqada oldı, 9-ı sağlam insanlarnıñ skriningi neticesinde qayd etildi, 2-si Ukrainadan (esas Ukrainadan – QA) keldi», – dep yazdı Aksenov «Vkontakte» saifesinde.
Onıñ malümatına köre, umumen Qırımda 1910 yañı koronavirus hastası qayd etildi. 85-i çetelden keldi, 117-si qomşu Rusiyeden kelgenler ve olarnen alâqada olğanlar, 1433 hasta tibbiy yardım içün muracaat etkende belli oldı ve qayd etilgen hastalarnen alâqada oldı, 275 hasta sağlam insanlarnıñ skriningi neticesinde belli oldı.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
