Tünevin ilhaq etilgen Qırımda 25 yañı koronavirus hastası qayd etildi, bunı Facebook saifesinde Qırımnıñ rusiyeli başı Sergey Aksönov haber ete.
"Olardan 19-ı COVID-19 adiseleri boyunca epidemiya qarşı tedbirler vaqtında, 2-si laboratoriya skriningleri yapılğanda, 4-ü - adamlar tibbiy yardımğa muracaat etkende tayinlendi", - yazdı o.
Qırım ve Aqyardaki Rospotrebnadzor idaresiniñ yolbaşçısı Dmitriy Krutikov bildirgeni kibi, adiselernin 5-i Qurman rayonında, 2-si - Aqmescitte, 15-i - Kezlevde qayd etildi. Birer adise Bağçasaray, Kefe ve Aqmeçit rayonlarında.
Qırımda 483 koronavirus hastası qayd etildi, 33-ü çetelden keldi, 86-sı qomşu Rusiyeden kelgen ve olarnen alâqada olğan insanlardır. 350 insan tüzeldi, 15 hasta vefat etti. Aqyarda 177 insan COVID-19 hastalığına oğradı. 145 kişi tüzeldi, üç insan vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
