İlhaq etilgen Qırımda aprelniñ 6-sında üç biñge yaqın adam koronavirus infektsiyası sebebinden tibbiy nezaret altında buluna, observatorlarda yigirmiden ziyade adam buluna. COVID-19 hastalığı olğan 5 adamnı hastahaneden çıqardılar.
Bunı Rusiye nezaretindeki Qırım Sağlıq Nazirligi bildirdi.
"Tibbiy nezaret altında 2936 adam buluna, olardan 2849 evlerindedir. Hastahanede 65 adam yata, observatorlarda - 22 adam. Rospotrebnadzornıñ malümatına köre, umumen 21 COVID-19 hsatası qayd etildi. Olardan 5-ini hastahanelerden çıqardılar", - denile beyanatta.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
Qırımda özüni izolâtsiya etüv rejimi aprelniñ 30-ınace uzatıldı, Aqyarda - aprelniñ 12-sinece.
Коронавирус под микроскопом (фотогалерея)
