Qırımdaki “Koktebel” yıllanğan yüksek keyfiyeteli şaraplar zavodı yanvarnıñ 26-nda 110,2 million rublege mezat etildi. Alıcı – "Köktebel" yıllanğan yüksek keyfiyeteli şaraplar zavodı" Sıñırlanğan mesüliyetli şirkettir (SMŞ).
Kelişme aqqında malümat mezatlar aqqında malümat yerleştirilgen Rusiye saytında yayınlanğan.
"Elektron şekilde keçirilgen mezatnıñ ğalibi (protsedura 178fz25122000049), 2021 senesi yanvarnıñ “26”-da saba saat 10-ni 4 daqqa keçkende olıp keçken mezatta eñ çoq para 110 178 094 ruble 77 kapik (QFB ile) teklif etken 538005 nomeralı İştirakçi tanıldı - "Köktebel" yıllanğan yüksek keyfiyeteli şaraplar zavodı" SMŞ", - yazıla saytta.
Mezatta eki şirket ve bir hususiy şahıs iştirak etti: "Köktebel" yıllanğan yüksek keyfiyeteli şaraplar zavodı" SMŞ kiracısı, Rusiyeden (Sankt-Peterburg) "NTTS "Krіstallkor" şirketi, hususiy şahıs – Permdeki (Rusiye) "Bonusmoll" SMŞ tesisçisi Andrey Şklovskiy.
Başlanğıç fiyatı 100 million ruble edi.
“Koktebel” yıllanğan yüksek keyfiyeteli şaraplar zavodı 1897 senesi quruldı. İşhaneniñ saytındaki malümatqa köre, zavodnıñ tahminen 1070 gektar yerde öz bağları bar ve köpüksiz şarap içün eñ azından 5 million litralıq ve keskin şarap ve portveynler içün eñ azından 6 million litralıq savut parkı bar.
Dekabrniñ 14-nde “Rusiye” bankınıñ terkibindeki “Cenübiy leyha” sıñırlanğan mesüliyetli şirket “Massandra” Qırım şarap zavodı satın aldı. Berilgen malümatqa köre şarap zavodı içün 5 milliard 327 million ruble berilgen.
“Cenübiy leyha” sıñırlanğan mesüliyetli şirket Sankt-Peterburgda qayd etilgen, onıñ 99,9 faizi “Rusiye aktsiyalı şirket”niñdir. 2017 senesi dekabr ayında şirket 1,5 milliard rublelik Suvdağdaki “Novıy Svet” şampan şarap zavodını satın aldı.
