Qırımda kiçik aynıñ 13-nde saba Sarabuzve Kaça köyleriniñ yanında Rusiye arbiy uçaq alanları yanında patlavlar eşitildi, dep haber ete yerli telegram kanalları. Mudafaa nazirligi Qırım yarımadasına eñ azından yedi dron ücüm etkenini bildirdi.
"Krımskiy veter" telegram-kanalı yazğanına köre, küçlü patlav Kaça rayonında yerli vaqıtqa köre saat 8:12-de olıp keçti. Daa soñra Sarabuz rayonında patlavlar aqqında haber peyda oldı. Rusiye akimiyeti ve arbiyleri vaziyetni izaatlamadı.
Daa soñra Rusiye Mudafaa nazirligi, saba saat 8:00-den saat 14:00-ke qadar Rusiye ava mudafaası quvetleri Qırım üzerinde yedi pilotsız uçaqnı urıp tüşürgenini bildirdi. Ne qadar dron tüşürilgenini nazirlik bildirmedi. Cenk şaraitlerinde Rusiye arbiyleriniñ malümatlarını alternativ menbalar yardımınen tasdıqlamaq imkânsızdır. Ukrayina arbiyleri bu ücümlerni daa izaatlamadı.
Daa evel Ukrayina arbiy quvetleriniñ pilotsız sistemalar quvetleri kiçik aynıñ 12-nde işğal etilgen Qırımnıñ Sarabuz qasabası yanındaki Rusiye arbiy uçaq alanına radar sistemasına darbe endirildi, dep bildirgen edi.
2022 senesinden başlap, Qırım yarımadasınıñ territoriyasına aman-aman er kün pilotsız uçaq ve raketalar ücüm ete, çoqusı allarda Rusiye Mudafaa nazirligi ya da Rusiye akimiyeti arbiy obyektlerge ücüm etkenini tasdıqlamay, bu malümatnı teşkermege imkân olsa da.