Qırım ve Aqyardaki Rospotrebnadzor idaresi yarımadada keskin nefes virus yuqunçı hastalarınıñ sayısı arta, dep bildire. Müessise yolbaşçısı Natalya Penkovskayanıñ malümatına köre, keçken aftağa baqqanda hasta sayısı eki qat, keçken senege baqqanda 4 qat arttı.
«Aqmescitte epidemiologik sıñır 13% büyük. Qırımda virus yuqunçı hastalarınıñ vaziyeti farqlı. 4 regionda virus yuqunçı hastalarınıñ sayısı cumhuriyet raqamından yüksek – Ermeni Bazarda, Sudaqta, Aqmeçet ve İslâm Terek rayonlarında. Mında hasta sayısı cumhuriyet raqamından eki qat ziyade. Keçken aftağa baqqanda Ermeni Bazar ve Aluştada hasta sayısı üç qat, Qarasuvbazar ve Aqşeyh rayonlarında 4 qat ziyade. Sudaqta ve Bağçasaray rayonında – 5 ve 6 qat ziyade», – dep bildirdi Penkovskaya yanvarniñ 20-nde COVID-19 ile küreş operativ ştabınıñ toplaşuvında.
Keçken afta Rospotrebnadzor yarımadada keskin nefes virus yuqunçı ve gripp hastalarınıñ sayısı eksile, dep qayd etken edi.
