Qırımnıñ Bağçasaray rayonındaki Belokamenka köyünde oktâbrniñ 17-nde saba tintüv keçirildi. Yerli sakin Nariman Ablâyevni belli olmağan yerge alıp ketkenler, dep bildire Qırım.Aqiqat mühbiri.
Bu malümatnı qırımtatar faali İsmail Ramazanov da tasdıqladı.
Qırım.Aqiqat tafsilâtlı malümat almağa tırışa. Rusiye quvet organları bunı izaatlamay.
Sentâbrniñ 27-nde Rusiye quvetçileri Sudaqta qırımtatar faali, Sudaq regional meclisiniñ reisi İlver Ametovnıñ evini tintken edi.
Qırım Muhtar Cumhuriyetiniñ prokuraturası İlver Ametovğa ait binalarda keçirilgen «qanunsız tintüvler» sebebinden cinaiy dava başlattı.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
