Qırımda keçken künü 308 yañı koronavirus hastası qayd etildi, bir kün evelsi qayd etilgen hastalarnıñ sayısı azca edi. Bu aqta Qırımnıñ Rusiye yolbaşçısı Sergey Aksenov Facebookta bildirdi.
«Hasta olğanlarnıñ umumiy sayısından 207 hasta tibbiy yardım içün muracaat etkende qayd etildi, 101 kişi daa evel qayd etilgen hastalarnen alâqada oldı. Bir künde 207 kişi tüzeldi, bütün müddet devamında 66 416 insan yahşı oldı», – dep yazıla haberde.
Yerli başlıqlarnıñ malümatına köre, bir künde 15 hasta ölgen, butün vaqıt devamında ise 2519.
Bir kün evelsi 293 yañı COVID-19 hastası aqqında haber etildi.
Keçken aftanıñ ortasından berli koronavirus hastalarınıñ sayısı arta.
Qırım ve Aqyardaki Rospotrebnadzor idaresi bildirgenine köre, Qırımnıñ bir çoq rayonında koronavirus vaziyeti kerginleşti. Müessise, Qırımda dördünci koronavirus dalğası beklenile, lâkin qırımlılar daa az aşı olmağa başladı, dep qayd etti.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
