Qırımda kelgen turistlerniñ sayısı artqanı içün yañı koronavirus hastalarınıñ sayısı arta. Bu aqta TASS Rusiye haber agentligi Qırım ve Aqyardaki Rospotrebnadzor idaresiniñ yolbaşçısı Natalya Penkovskayanıñ malümatına esaslanıp bildire.
«Şimdi Rusiye boyunca em Qırımda, em Aqyarda eñ az hastamız bar. Qırımğa kelgen insanlarnıñ sayısını baqılsa, hasta sayısınıñ kerçekten artqanını köremiz. Ukraina sıñırnı açtı, Ukrainadan kelgen insanlarnıñ sayısı arta, Qırımda turistlerniñ sayısı umumen arttı», – dedi o.
Penkovskaya, kelgenlerge koronavirus yuqusınıñ tarqaluvına qarşı tedbirlerge riayet etmek kerek, dep hatırlattı: maskalar taqılacaq ve mesafe olacaq.
Qırımda soñki künde 23 koronavirus hastası qayd etildi. Aqyarda – üç.
Akimiyetniñ malümatına köre, Qırımda 1139 COVID-19 hastası qayd etildi, Aqyarda – 339.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
