Qırımda daa bir hasta yañı koronavirus yuqunçından vefat etti. Bu malümatnı Qırımnıñ Rusiye sağlıq nazirligi derc ete.
Müessise malümatına köre, umumen 36 hasta COVID-19-dan vefat etti. Bu hastalar aqqında tafsilâtlı malümat ve qaysı regionlardan kelgeni belli degil.
«1692 insan tibbiy közetüv altında buluna, 125-i dinamik közetüv altında qala, 1423 kişi hastahanede qala, 144 insan observatorlarğa alındı», – dep aytıla müessise haberinde.
Keçken künü Qırımda 67 koronavirus hastası qayd etildi. Umumen Qırımda, akimiyetniñ malümatına köre, 3010 yañı koronavirus hastası qayd etildi, 93-ü çetelden keldi, 124-ü qomşu Rusiyeden kelgenler ve olarnen alâqada olğanlar. 1966 insan tüzeldi.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
