Qırımda koronavirusnen hastalanğan yerli sakinge qarşı özüni tecrit etmegeni içün birinci cinaiy dava açıldı.
Bu aqta martnıñ 30-nda koronavirus yuqunçınıñ tarqaluvına qarşı tedbirler meseleleri operativ ştabınıñ toplaşuvında Qırımdaki Rusiye İç işler nazirliginiñ yolbaşçı muavini Aleksandr Smaglin bildirdi.
«Tünevin özüni tercrit etüv talaplarına uymağan ve başqa insannı hastalıqqa oğartqan şahısqa qarşı cinaiy dava açıldı. Dava açıldı, bütün malümat toplandı», – dedi Smaglin.
Qırımnıñ Rusiye yolbaşçısı Sergey Aksenov Qırımdaki koronavirus vaziyeti toplaşuvında çetelge barğanını gizlegen vatandaşlarğa qarşı el küreşi çalımlarını işlemege çağırdı.
«Qırım aq qorçalayıcı gruppasınıñ» koordinatorı Olga Skripnikniñ fikirince, Aksenov yarımada sakinlerine qarşı küç qullanmağa çağırğanı içün mesüliyetke çekilmeli.
Daa evel berilgen malümatqa köre, martnıñ 30-nda Qırımda 2801 insan tibbiy közetüv altında buluna, 62 insan – hastahanede, 10 kişi – observatorlarda.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
