Kreml kontrolindeki Qırım akimiyeti izolâtsiya rejiminiñ bozuluvı içün para cezaları qanunınıñ işke tüşürilüvini çarşenbege qadar bekletmege qarar aldı. Bu aqta aprelniñ 11-nde Qırımnıñ Rusiye yolbaşçısı Sergey Aksenov Qırımda koronavirus yuqunçınıñ tarqaluvına qarşı operativ ştab toplaşuvında bildirdi.
«Qararnı Devlet şurasına çıqarmazdan evel İç işler nazirliginen uzun-uzun laf ettik ve inceledik. Para cezaları tek qaidelerni bozğanlarğa qarşı qullanılmalı. Bu nasıl yapılacaq – Pavel Leonidoviçnen añlaştıq – çarşenbege qadar çalışamız. Çarşenbege qadar tek profilaktika subetleri olacaq. Vazifemiz bir – ihtiyacı olğan, aş, ilâc almağa çıqqan iç kimse zarar körmeycek», – dedi Aksenov.
Qırımnıñ Rusiye parlamenti yarımadada memuriy cinayetler qanunınıñ tüzetüvlerini qabul etti. Deputatlar Qırımda özüni izolâtsiya etüv rejimini bozğanlar içün para cezalarını sertleştirdi.
Qabul etilgen qanunğa köre, memurlar 30 biñden 40 biñ rublege qadar (10,8 – 15,5 biñ ğrıvnâ) para cezasını; şirketler – 200 biñden 300 biñ rublege qadar (72,6 – 108,9 ğrıvnâ) para cezasını alacaq.
Adiy vatandaşlar 4 biñ ruble (1,4 biñ ğrıvnâ) miqdarında para cezasını alacaq.
Memuriy cinayet tekrar yapılsa, memur 40 biñden 50 biñ rublege qadar (15,5 – 18,1 biñ ğrıvnâ); şirket 300 biñden 500 biñ rublege qadar (108,9 – 181 biñ ğrıvnâ) para cezasını alacaq.
Adiy vatandaş tekrar memuriy cinayet yapsa, 5 biñ ruble (1,8 biñ ğrıvnâ) memuriy para cezasını alacaq.
Naqliyat qullanılğan memuriy cinayet içün 5 biñ ruble para cezası berilecek.
Qırımda aprelniñ 11-nde daa bir koronavirus hastası, yaltalı, qayd etildi. Qırımda 29 COVID-19 hastası bar.
Aqyarda altı insan hastalandı, yördü tüzelip yahşı oldı.
Qırımda özüni izolâtsiya etüv rejimi aprelniñ 30-na qadar, Aqyarda ise aprelniñ 19-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
