İşğal etilgen Qırımda Rusiye prezidentiniñ avalesinen izinsiz qurulğan inşalarnı mahkemesiz – Qırımnıñ Rusiye yolbaşçısı Sergey Aksenovnıñ doğru buyruğı esasında – yıquv qaidelerini azırlamağa isteyler. Bu aqta Rusiye ükümetiniñ baş nazir muavini Yevgeniy Kabanov «Krıminform» neşirine bildirdi.
«Bu pek yardım eter. Qayd etilgen qanunsız inşanı yıqmaq içün tahminen üç yıl mahkemede bulunmağa kerek. Şunıñ içün hususan Qırım cumhuriyeti içün federal qanunlarğa kirsetmege teklif etken novellasız tapılğan qanunsız obyektlerniñ yıqıluvını tezleştirmege imkân berecek. Belli bir obyektniñ yıqılmasına eñ çoq üç-altı ay kerek olacaq, dep tüşünem», – dep tarif etti Kabanov.
Memurnıñ bildirgenine köre, Qırımnıñ Rusiye ükümeti azırlağan tekliflerde izinsiz qurulğan obyektler mahkemesiz yıqılacaq.
«Paradigmamızda – ebet (mahkemesiz), federal zenaatdaşlarımız buña ne aytacaq baqarmız. Amma azırlağan qanun leyhamızda cumhuriyet yolbaşçısınıñ qararı esasında yapılacaq», – dep ayttı o.
Rusiye kontrolindeki Qırım yolbaşçısı Sergey Aksenovnıñ fikirince, yarımadada izinsiz qurulğan inşalarnıñ sayısı «qarardan çoq» oldı. Şu sebepten Qırımnıñ Rusiye akimiyeti izinsiz qurulğan binalar sebebinden cinaiy mesüliyetke çekmek içün belli qanunnıñ qabul etilüvini teklif ete.
Qırımnıñ Rusiye akimiyeti, 2019 senesi «izinsiz qurulğan obyektler» olaraq ilân etilgen binalarnı, hususan turistler arasında populâr olğan yarımadanıñ cenübiy yalısında, yıqmaq içün tahminen 300 mln ruble berecek, dep bildirgen edi.
