Rusiyeniñ nezaretinde olğan Aqmescitniñ Kiyev rayon mahkemesi Ukrayina prezidentiniñ Qırım MC-deki sabıq temsilcisi İzet Gdanovnı ğıyabiy şekilde sekiz yıl sert apis cezasına mahküm etti. Bunı TASS agentligi Qırım boyunca Rusiye FSB idaresine atfı etip haber ete.
Şu malümatqa köre, 2021 senesi sentâbr ayında Rusiye quvetçileri Gdanovğa qarşı cinayet davasını açqanlar. O, Noman Çelebicihan adına qırımtatar göñülli batalyonında iştirak etüv ile qabaatlandı. Rusiye FSB-si, "Gdanov halqara ve federal qıdıruvğa ilân etilgenini" bildire.
Al-azırda Aqmescitteki mahkemeniñ ve RF FSB saytları açılmay.
Gdanov Qırım.Aqiqatqa, Qırımdaki Rusiye mahkemeleriniñ qararları onı meraqlandırmağanını bildirdi.
"Muvaqqat işğalci memuriyeti ve omuzdaşları çıqarğan sahte ükümlerni taqip etmeyim. Maña bu meraqlı degil. Bizni artıq azat Qırımda beklesinler", - dedi Gdanov.
2021 senesi noyabr ayında İzet Gdanov, quvetçiler Qırımda ana-babasınıñ evine tintüvnen kelgenini haber etken edi.
2017 senesi avgust ayından 2019 senesi iyül ayına qadar İzet Gdanov Ukrayina prezidentiniñ Qırım MC-deki daimiy temsilcisiniñ birindij muavini vazifesini eda etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
