Qırımnıñ rusiyeli akimiyeti iyünniñ 1-inden başlap ayvanat bağçalarınıñ ve turistik agentlikleriniñ işini başlamağa razı oldı. Bunı Kreml kontrolindeki Qırım ükümetiniñ yolbaşçısı Yuriy Gotsanük bildirdi
"Ayvanat bağçalarınıñ faaliyeti, balalarnıñ kündüz baqılması, turistik operatorlarnıñ ve agentliklerniñ işi, aşayt mallarını satmağan tükânlarnıñ işine ruhset berilecek", - dedi Gotsanük.
Daa evel bildirilgeni kibi, Qırımda iyünniñ 15-inece amamlar, saunalar, fitnes klubları, qapalı havuzlar, SPA merkezleri ve sport zalları çalışmaycaq.
Daa evel Aksönov bildirdi ki, iyünniñ 15-inden başlap Rospotrebnadzor talaplarına uyıp sanatoriy ve kurort saası çalışıp başlaycaq, amma anda yalıñız qırımlılar raatlana bile.
Ve yarımadada iyünniñ 1-inden başlap kafe ve restoranlarnıñ açıq meydançıqları çalışıp olacaq.
Şimdilik Qırımda 369 yañı koronavirus hastası qayd etildi. 27-si çetelden keldi, 74 kişi qomşu Rusiyeden keldi. 11 insan vefat etti. Aqyarda 161 COVID-19 hastası bar, üç kişi vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
