Qırımda Rusiye quvetçileri yarımadağa pensiya içün muracaat etmek kelgen ukrayin Dmıtro Orlovnı yaqaladılar. Bunıñ aqqında Rusiye tarafdarı bloger Aleksandr Talipov haber etti.
Talipov Orlovnıñ sorğuğa çekilmesiniñ videosını özüniñ "Krımskiy SMERŞ" Telegram kanalında yayınladı. Ukrayin 2022 senesinece Ukrayinada yaşağanını bildirdi. İçtimaiy ağlarındaki saifelerinde Rusiye ordusı aqqında menfiy fikirler ayta ve Rusiyeniñ Ukrayinağa qarşı başlatqan cenkni takbih ete edi. 2023 senesi Orlovnıñ bildirgenine köre, o, Keriçke pensiya resmiyleştirmek içün kelgen.
Talipovnıñ bildirgenine köre, Orlovnıñ em Ukrayina, em Rusiye vatandaşlığı ve Keriçte dairesi bar.
Rusiye qanun qoruyıcı organları Orlovnıñ yaqalanması aqqında resmiy şekilde haber etmedi.
Rusiyede ve işğali altındaki topraqlarda Ukrayinağa qoltutqan sakinler taqip etile. Rusiye tarafdarı bloger Aleksandr Talipov Telegram kanallarında Ukrayinağa qoltutqan qırımlılarnıñ şahsiy malümatını derc ete. Talipovnıñ şikâyetleri neticesinde qırımlılarnı Rusiye ordusını «itibardan tüşürgeninde» qabaatlap, memuriy ve cinaiy mesüliyetke çekeler. Ukrayina prokuraturası Talipovğa qarşı «milletlerara nefret doğuruv» maddesine istinaden cinaiy tahqiqat başlattı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
