İlhaq etilgen Qırımda “Hizb ut-Tahrir” teşkilâtınıñ tarafdarları içün “reabilitatsiya merkezi” teşkil etilecek. Onı rusiyeli Qırım ve Aqyar şeeri müsulmanları Diniy idaresi (QAMDİ) yanında yaratacaqlar. Bu aqta RİA Krım haber agentligine Rusiye Devlet Dumasında Qırım mebusı Ruslan Balbek bildirdi.
“Müftiyatnıñ yanında Rusiyede yasaqlanğan “Hizb ut-Tahrir” terror teşkilâtınıñ tesirine tüşken adamlar içün reabilitatsiya merkezi teşkil etilecek”, - dedi o.
Onıñ aytqanına köre, QAMDİ endi psihologlar ile “reabilitatsiya” programmasını azırlap başlağan.
O, teşkilât talimatını sadece “silâ küçünen degil de, maneviy terbiyalavnen” de “yoq etmege” teklif ete.
Onıñ fikrine köre, “maneviy ve psihologik reabilitatsiya”dan soñ diniy baqışlarından vazgeçken “Hizb ut-Tahrir” tarafdarlarını cinayet mesüliyetlikten boşatmaq kerek.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
Martnıñ 27-nde ve 28-nde Aqmescitniñ Kiyev rayon mahkemesi tutulğan bütün faallerni apiske aldı.
Martnıñ 29-nda Qırımda tevqif etilgen 23 qırımtatar faalini Rusiyege alıp ketkenler.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
