Qurmandaki «Hizb ut-Tahrir davasınıñ» mabüsi Eskender Abdulganiyev acele tibbiy yardımğa muhtac, dep bildirdi Ukraina Yuqarı Radasınıñ insan aqları vekâletlisi Lüdmila Denisovanıñ matbuat hızmeti.
Onıñ malümatına köre, Abdulganiyevniñ tişi ağırdı, yüksek sıcağı köterilgen edi. Penitentsiar müessisesiniñ tibbiy bölüginde tişni çıqarğanlar, amma yara qapanmadı ve qanamağa devam ete.
Bundan ğayrı, Abdulganiyevniñ quyruq kemigi kistiniñ yanğısı oldı, pek ağırdı, amma tibbiy yardım öyle de kösterilmedi.
Denisovanıñ aytqanına köre, bu kefil etilgen İnsan aqları ve esas serbestlikleri şartnamesiniñ 3-ünci maddesine ve BM İqtisadiy ve İçtimaiy Şurası tasdıqlağan mabüslerge yanaşuv qaideleriniñ 22-nci noqtasına zıt kele.
Denisova, Rusiye İnsan aqları vekâletlisi Tatyana Moskalkovadan Ukraina vatandaşınıñ aqlarını ğayrıdan tiklemek içün acele tedbir almasını rica ete. Laf ihtisasiy tibbiy yardım kösterilmesi içün kerek olğan tolu tibbiy tedqiq keçirilmesi aqqında kete.
Yanvarniñ 9-nda advokat Lilâ Gemeciniñ bildirgenine köre, Aqmescit SİZOsında 10 kün devamında Eskender Abdulganiyevge tibbiy yardım kösterilmey. Aqmescit SİZOsı advokat ve ombudsmenniñ aytqanlarını izaatlamay.
2019 senesi dekabr ayında Rostov-na-Donu Cenübiy okrugınıñ arbiy mahkemesi Qurmandaki «Hizb ut-Tahrir davası» mabüslerini 2020 senesi iyünniñ 13-ne qadar apiste qaldırdı.
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı. Fevralniñ 15-nde Kreml kontrolindeki Kiyey rayon mahkemesi olarnı tevqif etti.
Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
