Qırımda «Hizb ut-Tahrir davası» mabüsleriniñ anaları Emine Abdulganiyeva ve Zure Emirüseinovağa cöreme ödemek içün para topladılar. Olar oğullarınıñ destegine bir kişilik piketler keçirgenleri içün para cezasına mahküm etilgen ediler.
Bunı «Qırım birdemligi» cemaat birleşmesi advokat Sabri Talıpovğa atfı etip bildire.
«25 biñ ruble olğan para cezası qırımtatarlarnıñ yardımı ile tölendi. Er kes kerek olğan paranı toplamaq içün 10-nar reble berdi», – dep yazıla bildirmede.
Rustem Emirüseinovnıñ anası Zure Emirüseinova, cöremelerge baqmadan oğlunıñ azat etilmesi oğrunda küreşecegini bildirdi.
«Biz paranı ödedik, amma adaletsizlikke qarşı soñunace, oğullarımız azat etilmegence küreşmege devam etecekmiz», – dedi Emirüseinova.
Hatırlatamız, avgustnıñ 2-nde Rusiye kontrolindeki Qırım Yuqarı mahkemesi Qurmandaki «Hizb ut-Tahrir davasınıñ» mabüsi Eskender Abdulganiyevniñ anası Emine Abdulganiyevanıñ istinaf şikâyetini red etip, oğluna bir kişilik narazılıq aktsiyası sebebinden berilgen 10 biñ ruble para cezasını deñiştirmedi.
Rusiye kontrolindeki Qırım Yuqarı mahkemesi daa evel bir kişilik narazılıqlarğa çıqqan qırımlılar Arsen Abhairov ve Rustem Emiruseinovnıñ anaları Zeliha ve Zureniñ istinaf şikâyetlerini red etti.
2020 senesi oktâbrniñ 31-nde Qurmandaki «Hizb ut-Tahrir davası» mabüsiniñ anası Zeliha Abhairova oğlu Arsenniñ taqip etilüvine qarşı bir kişilik narazılıq aktsiyasına çıqqan edi.
Noyabrniñ 3-nde saba Rostov-na-Donu Cenübiy okrugınıñ arbiy mahkemesi Qurmandaki «Hizb ut-Tahrir davasınıñ» üç mabüsi Rustem Emiruseinov, Arsen Abhairov ve Eskender Abdulganiyevni 17, 13 ve 12 yılğa üküm etti. Olar qabaatlarını tanımadı. Mahküm etilgen qırımlılarnıñ advokatları ükümni şikâyet etip, Avropa insan aqları mahkemesine barmağa niyetlene.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
