Aqmescitte Rusiye kontrolindeki Qırım Yuqarı mahkemesi istinaf şikâyetini red etip, «Hizb ut-Tahrir davasınıñ» mabüsi olğan arap tili mütehassısı İsmet İbragimovnı 2021 senesi martnıñ 2-ne qadar uzattı. Bu aqta «Qırım birdemligi» cemaat birleşmesi Qırım.Aqiqatqa bildirdi.
Advokat Ayder Azamatovnıñ aytqanına köre, İbragimov IV Jeneva şartnamesine riayet etmege rica etti, çünki Ukraina vatandaşı ola. İmaye, birinci instantsiya mahkemesiniñ qararını qanunsız ve sebepsiz tanımağa rica etti.
«Üç kiçik balası bar, qorantanı baqqan yekâne kişi ola. Amma imayeniñ eñ büyük delili İsmet İbragimovnıñ cinayetçi olmağanı ve bu cinayetni yapqanına dair bir delil olmağanı ola. İsmet, devlet qabaatlayıcıları, ne yazıq ki, em bugün, em keçken seferleri aynı şeyni sebepsiz ayta, dep qoştı», – dep izaatlay advokat.
İsmet İbragimovnıñ imayecisi Rusiyeniñ Cenübiy okrugınıñ arbiy mahkemesinde 2021 senesi fevralniñ 3-ne ilk diñlevler belgilendi, dep bildirdi.
«Yaqında onı mahsus blokqa avuştırğanlar – sebebini aytmayıp. Mahsus blokta ağır maddeli insan otura, dep aytqanlar. Anda İsmetni avuştırmağa kerek oldı. Onıñ aytqanına köre, yarım yıl içinde SİZO tarafından bir tenbi olmadı, bir bozuv olmadı. Yani birisi ağır maddege istinaden keçken insannen beraber qalmasını istedi», – dep bildire imayeci Azamatov.
İsmet İbragimov iyülniñ 7-nde Aqmescit rayonınıñ Kurtsı qasabasında tutuldı. O künü daa altı qırımtatarı tutuldı. İbragimov Rusiyede ve işğal etilgen Qırımda yasaqlanğan «Hizb ut-Tahrir» faaliyetini teşkil etkeninde qabaatlana.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
