Rusiye nezaretinde olğan Aqmescitniñ Merkeziy rayon mahkemesi oktâbrniñ 11-nde ve 29-nda Qurman "Hizb ut-Tahrir davası" boyunca diñlevlerge kelgen yedi qırımtatarnı para cezasasına mahküm etti. Bunı "Qırım birdemligi" cemaat birleşmesi haber etti.
Cemaat imayecisi Ayder Suleymanovnıñ bildirgenine köre, olar RF Memuriy uquq bozma qanunnamesiniñ 20.6.1 ve 20.2 maddelerine köre 10-15 biñ ruble para cezasını aldılar.
"Neticede Nariman Müydinov 20.2 maddesiniñ 5 qısmına banaen 10 biñ ruble, Selim Teyfukov, Alimhan Abitov, Kazim Ablâlimov 20.6.1 maddesiniñ 1 qısmına binaen 15 biñ ruble, Nariman Parmanov, Eldar Enverov ve Mustafa Yurdanov 20.2 maddesiniñ 5 qısmına banaen 15 biñ ruble para cezasına mahküm etildi", - dep yazıla bildirmede.
Ayna zamandan Suleymanovnıñ sözlerine köre, protokollarda bir çoq haalar bar: vaqıt yazılmağan, insanlarnıñ sayısı aqqında malümat yañlış.
Mudafaa tarafı mahkemeniñ qararını temyiz etecek.
Cumaertesi künü, oktâbrniñ 25-nde, Aqmescitteki Qırım garnizon arbiy mahkemesiniñ binası ögünde Rusiye quvetçileri Qurmandaki «Hizb ut-Tahrir davasınıñ» mabüslerine qoltutmaq içün toplaşqan 20-den çoq kişini tuttı. Tutulğanlarnı Aqmescitniñ Merkeziy rayon polis bölügine alıp kettiler.
Daa soñra Rusiyeniñ Merkeziy rayon bölügine kelip, saba mahkeme ögünde tutulğan qırımtatarlarğa uquqiy yardım köstermek içün kelgen advokat Edem Semedlâyevge qarşı «poliske boysunmağanı» içün memuriy protokol tizildi.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
