Oktâbrniñ 24-nde üçünci Bağçasaray "Hizb ut-Tahrir davası"nıñ mabüsi Seytumer Seytumerovnıñ evinde qadınlar dua oqudılar. Ükümniñ çıqarılması arfesinde semetdeşlerini desteklemek içün diger siyasiy mabüslerniñ apayları ve anaları da keldiler, dep haber ete "Qırım birdemligi".
Oktâbrniñ 20-nde Rostov-na-Donudaki Cenübiy bölgeniñ arbiy mahkemesinde qabaatlav tarafı Bağçasaray "Hizb ut-Tahrir davası"nıñ dört mabüsi içün 66 yıl apis cezasını istedi. Prokuror Seytumer Seytumerovnıñ 20 yıl, Osman Seytumerovnıñ 17 yıl, Rustem Seytumerovnıñ 16 yıl, Amet Suleymanovnıñ 13 apis cezasına mahküm etilmesini istedi.
Bundan ğayrı, oktâbrniñ 23-nde Aqmescit rayonınıñ Sarabus qasabasında da qırımtatarlar dua oqudılar. Dua Qurman "Hizb ut-Tahrir davası"nıñ mabüsleri içün oquldı.
Oktâbrniñ 22-nde Qurman "Hizb ut-Tahrir davası"nıñ mabüsleri içün Yañı Sarabuz qasabasında da dua oquldı.
Dualar, Cenübiy bölgeniñ arbiy mahkemesiniñ Rustem Emirüseinov, Arsen Abhairov ve Eskender Abdulganiyevge çıqarğan ükmünen qarşı advokatlarnıñ istinaf şikâyetleriniñ baqılması üzre Vlasiha şeer bölgesinde Arbiy istinaf mahkemesiniñ oktâbrniñ 25-ne qararlaştırılğan oturışı arfesinde oquldı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
