Gvardeyskoye qasabasındaki aviabazağa endirilgen raketa ücümi neticesinde üç Rusiye arbiyi yaralandı, dep haber ete ASTRA telegram-kanalı menbalarğa atıf etip.
Qayd etilgenine köre, eki belgisiz raketa martnıñ 1-nde saat 16:00 civarında ava bazasına tüşti. Eki raketa da patladı. Ava limanınıñ idare yolu zarar kördi, 3 arbiy adam yaralandı, dep aytıla haberde.
Martnıñ 1-nde Gvardeyskiy rayonında patlavlar aqqında haber etilgen edi. Yerli telegram kanallarında derc etilgen qara tüsten resimden ğayrı, bu malümatnı tasdıqlağan bir şey yoq edi. Bundan soñ köyde elektrikler yoq oldı, dep haber etile.
Qırım.Aqiqatnıñ malümatına köre, anda, hususan, Rusiye aviabazası buluna, anda eki Su-24M ve Su-25SM (12 maşna) eskadrilyasından ibaret olğan 37-nci qarışıq aviatsiya polkг yerleşe.
2022 senesi avgustnıñ 16-nda aviabaza yanında patlavlar oldı. Aynı patlav 2023 senesi martnıñ 29-nda oldı. Daa eki patlav 2023 senesi avgustnıñ 2-nde qayd etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
