Qırımda Aqmescit – Yalta yolunda eki maşinanıñ çatışuvı neticesinde beş insan elâk oldı, daa üçü yaralandı. Bu aqta «RİA-Krım» Rusiye neşiri Qırımdaki Rusiye İç işler nazirliginiñ idaresi bergen malümatqa esaslanıp bildire.
İç işler nazirliginde bildirgenlerine köre, Chevrolet Lacetti maşinasınıñ 1999 senesi doğma aydavcısı Aqmescit tarafından Colman (Pionerskoye) köyüne ketip, qarşı yolaqqa çıqıp, 1969 senesi doğma aydavcısı olğan Mercedes Vito maşinasınen çatıştı.
«Yol qazası neticesinde Chevrolet Lacetti maşinasınıñ aydavcısı ve üç yolcusı, Mercedes Vito aydavcısı elâk olğanlar. Mercedes Vito maşinasınıñ daa üç yolcusı yaralandı», – dep bildirdi idare.
Aqmescit – Yalta yolunda aprelniñ 26-ndan 27-ne keçer gecesi Eski Orda (Lozovoye) köyü rayonında Chevrolet-Lacetti ve Mersedes Vito maşinaları çatıştı. Qırımdaki Rusiye Fevqulâde vaziyetler nazirligi qaza aqibetlerini yoq etmek içün 21 insan ve 7 dane tehnika celp etildi, dep haber etti.
2018 senesi dekabr ayında Qırım qurtarıcıları Qırımda büyük yol qazalarınıñ sayısı arttı, dep bildirdi. Qırımda 2019 senesiniñ ilk üç ayı içinde keçken seneniñ aynı müddeti içinde mesüliyetke çekilgen aydavcılarnıñ sayısı bir buçuq qat ziyade oldı.
