Qırımnıñ Rusiye yolbaşçısı Sergey Aksönov, noyabrniñ 26-nda yarımadanı basqan furtuna neticesinde zarar tahminen 42 mlrd rubleni teşkil etti, dep bildirdi.
''Yalta, Aluşta, Keriç, Kezlev, Saq rayonı, Qara deñiz rayonı kibi bütün belediyelerniñ yalı kenarları zarar kördi. Yalıdaa olğan er şeyni suv alıp ketti. Bazı yalı qamaçavları yıqıldı. İlk olaraq, zarar 40-42 mlrd rublege qıymet kesildi'', - dep ayttı memur "Krım 24" telekanalınıñ yayınında.
Aksönovnıñ aytqanına köre, 436 biñ insan 10 biñ rublelik tazminat içün ariza berdi, tahminen 7,5 biñ insan ödeme aldı.
Noyabrniñ 26-nda Qırımnı küçlü furtuna qaplap aldı - çeşit regionlarda biñlernen terek yıqıldı, yüzlernen ev zarar kördi. Qırımnıñ Rusiye akimiyetiniñ bildirgenine köre, furtuna neticesinde beş insan elâk oldı. Qırımnıñ Rusiye Fevqulâde vaziyetler nazirliginiñ yolbaşçısı Sergey Sadakliyev zarar 39,7 milliard ruble miqdarında olğanını tahmin etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
