Rusiye kontrolindeki Aqmescitniñ Kiyev rayon mahkemesinde FSB tutqan Ukraina deñizcileriniñ cezası belgilenecek oturışuv başladı, dep bildire Qırım.Aqiqat mühbiri.
Daa evel haber etilgeni kibi, Rusiye uquq qoruyıcıları telükesizlik tedbirlerini quvetleştire, mahkeme binasına politsiya maşinaları, mahkeme vekilleri ve Rusiye OMON hadimleri keldi.
Qırım.Aqiqat alğan malümatqa köre, mahkeme oturışuvları üç salonda keçirilecek. Diñlevlerge ancaq Rusiye kütleviy haber vastaları içün tizilgen cedveller boyunca kirmek mümkün. Oturışuvğa kelgen rusiyeli aq qorçalayıcılar içeri alınmadı.
Jurnalist Anton Naumlük bildirgenine köre, al-azırda tutılğan Ukraina deñizcilerinden biri Yuriy Budzılonıñ cezası belgilene. Qadı – Andrey Dolgopolov, advokat – Ayder Azamatov.
«Bugün qadılar Viktor Mojelânskiy, Andrey Dolgopolov ve Mihail Belousov 12 deñizciniñ cezasını belgileycek, qalğanlarını mahkeme yarın baqacaq. Yaralanğanlarnıñ cezası Keriçte belgilecek, olar arbiy bölükniñ tibbiy qısmında buluna», – dep bildirdi jurnalist.
Daa evel haber etilgeni kibi, qırımlılar Aqmescitteki Kiyev rayon mahkemesiniñ binası ögünde toplaşa. Olar FSB esir alğan Ukraina askerlerine qoltutmağa keldi.
Salı künü saba belli oldı ki, Ukraina deñizcilerini sekiz qırımlı advokat imaye etecek.
Ukraina Arbiy deñiz quvetleri bildirgenine köre, noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Keric burhanı süretlerde
Qırımdaki Rusiye FSB idaresi bildirgenine köre, noyabrniñ 25-nde Ukrainağa ait üç arbiy gemi «Rusiyeniñ devlet sıñırından qanunsız» keçip, Keriç boğazı yolunda «telükeli areketler» yaptı.
Daa soñra belli oldı ki, FSB Qara deñizde Ukraina gemilerine qarşı silâ qullandı. Kyivniñ malümatına köre, FSB açqan ateş neticesinde altı Ukraina askeri yaralandı. Rusiye FSBsi Ukraina gemilerine qarşı silâ qullanılğanını tasdıqlap, yaralanğan üç Ukraina deñizcisi aqqında haber etti.
Qırımnıñ Rusiye yolbaşçısı Sergey Aksenov bazarertesi künü bildirgenine ki, Rusiye uquq qoruyıcıları Ukraina Arbiy deñiz quvetlerine ait üç gemini noyabrniñ 25-nde Keriç boğazında zapt etip, 24 Ukraina askerini tuttı.
Ukraina Yuqarı Radasınıñ insan aqları vekâletlisi Lüdmila Denisova Rusiye ombudsmeni Tatyana Moskalkovanıñ malümatına esaslanıp bildirdi ki, Keriç boğazında esir alınğan üç Ukraina askeri Keriç hastahanesinde buluna.
Ukraina Yuqarı Radası Keriç boğazında Rusiye arbiyleri tarafından Ukraina gemilerine açılğan ateş sebebinden bir qaç vilâyette cenk vaziyetini ilân etti.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
Soñki vaqıtları Azaq deñizi Rusiye uquq qoruyıcıları, birinciden Ukraina limanlarına ketken ve andan kelgen gemilerni tutqan sıñırcıları, tarafından yapılğan provokatsiyalarnıñ yeri oldı.