Rusiye kontrolindeki Qırım akimiyeti martnıñ 18-nden soñ esas Ukrainadan kelgen yarımada sakinlerini karantinge yollaycaqlar. Bu aqta martnıñ 17-nde jurnalistlerge Qırımnıñ Rusiye parlament spikeri Vladimir Konstantinov ayttı.
«(Esas Ukrainadan – QA) kelseñ, karantinge tüşeceksiñ, qırımlı olıp mında qaytsañ bile, seni karantinge yollaycaqlar. Ukrainalılar karantinsiz de kirip olamaz. Çıqmağa istegen er kes çıqsın, amma karantinsiz qaytıp olamaycaqsıñız», – dep bildirdi Konstantinovnıñ aytqanlarını TASS agentligi.
Konstantinovnıñ jurnalistlerge bildirgenine köre, martnıñ 18-nde geceden itibaren Qırım tarafında yarımada ve Herson vilâyetiniñ memuriy sıñırı tamamen qapatılacaq.
Ukrainanıñ vaqtınca işğal etilgen topraqlar ve vaqtınca memleket içinde köçip kelgenler meseleleri nazirligi bildirgenine köre, 2020 senesi aprelniñ 3-ne qadar Qırım ve Herson vilâyetiniñ kontrol noqtalarında keçiş sıñırlandı.
Ukraina Devlet sıñır hızmeti, esas Ukrainada qayd olmağan vatandaşlar kirsetilmeycek, dep bildirdi.
Bir çoq Ukraina aq qorçalayıcı teşkilâtı Qırım ve Herson vilâyetiniñ memuriy sıñırını keçişte sıñırlavlar qararını telükeli dep saya.
Yañı çeşit koronavirus yuqunçı 2019 senesi dekabr ayında Qıtayda tarqalıp başladı.
2019-nCov (COVID-19) virusı büyük koronaviruslar gruppasına aittir. Bazılarda hastalıq qolay keçe, bazılarınla suvuqlanuv ve gripp alâmetleri, em de yüksek sıcaq ve öksürik bar, ağır hastalarda nefes tarlığı qayd etile. Bu öldürici ola bilecek pnevmoniyağa keçe bile.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
