2021 senesi oktâbr ayınıñ soñunda olğan malümatqa köre, işğal etilgen Qırımda eñ azından 116 adam siyasiy ya da diniy cinayet davaları sebebinden azatlıqtan marum etilgen. Bunı "Qırım uquq qoruyıcı gruppası" haber ete.
"Qırımda oktâbrniñ soñunda olğan malümatqa köre, 116 adam siyasiy ve/ ya da diniy cinayet davaları sebebinden azatlıqtan marum etilgen... Daa 4 kişi siyasiy sebeplerden azatlıqtan marum etilgeni tahmin etile. Daa 9 adam ev apsinde buluna", - dep yazıla Facebookta yayınlanğan beyanatta.
Qayd etilgenine köre, oktâbr ayında azatlıqtan marum etilgen Qırım sakinleriniñ umumiy sayısı 79 kişidir.
"Daa beş insan dolaşuv serbestliginden marum etilgen: üçü nezaret altındalar ve işğal etilgen topraqnı terk etip olamaylar, daa ekisi ev apsinde", - dep qayd eteler uquq qoruyıcılar.
Aq qorçalayıcılarnıñ malümatına köre, Qırım ve Rusiyedeki Rusiye apishanelerinde 127 ukrainalı siyasiy mabüs tutula.
Ukraina prezidenti Volodımır Zelenskıy Kreml ukrainalı siyasiy mabüslerni, hususan qırımlılarnıñ Rusiye apsinden azat etüv esnasını «aqsata», dep aytqan edi.
Qırımnıñ Rusiye yolbaşçısı Sergey Aksenov Qırımda siyasiy mabüsler «kesen-kes yoq», dep israr ete.
