Qırımda koronavirus yuqunçına oğrağan daa eki insan qayd etildi. Bu aqta Qırımnıñ Rusiye yolbaşçısı Sergey Aksenov Facebook saifesinde bildirdi.
«Hastalardan biri daa evel tasdıqlanğan hastanıñ qorantasından kele. Ekincisi Moskva-Aqmescit treninde sıcağı qayd etilgen yolcu aqqında malümat Rospotrebnadzornıñ regionlarara idaresine berilgen soñ qayd etildi. Yolcu yuqunç hastahanesine alındı, qırğınlıqqa qarşı tedbirler alındı», – dep yazdı Aksenov.
Trende hastanen alâqada olğanlar közetüv altında buluna, laborator tedqiqleri yapıla.
Yarımadada 61 koronavirus hastası bar – 45-i Qırımda ve 16-sı Aqyarda qayd etildi.
Aprelniñ 30-na qadar Qırımda bir çoq müessise ve teşkilâtnıñ faaliyetini toqtatqan ve vatandaşlarnı izolâtsiyağa mecbur etken yüksek seviyeli azırlıq rejimi bar.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
