Qırımda soñki künde COVID-19 diagnozı tasdıqlanğan eki qadın vefat etti. Bu aqta Qırımnıñ Rusiye yolbaşçısı Sergey Aksenov yañı koronavirus yuqunçınıñ tarqaluvı ile küreş operativ ştabınıñ toplaşuvında mayısnıñ 12-nde bildirdi.
«Keçken künü eki qadın vefat etti, şimdilik daa belli degil, hastalıqları bar edi, belki, amma koronavirusqa oğrağan ediler», – dedi Aksenov.
Kreml kontrolindeki Qırımnıñ baş nazir muavini Yelena Romanovskayanıñ aytqanına köre, qadınlardan biri Aqmescitte, ekincisi Saqta tedaviylengen edi.
«Eki ağır hasta vefat etti, biri №7 Aqmescit hastahanesinde bulunğan edi – 1951 senesi doğğan qadın, eki taralı pnevmoniyası ve tasdıqlanğan koronavirus diagnozı bar edi, bir sıra ciddiy hronik hastalığı da bar edi, olar hastalıqnı ağırlaştırdı. Ekinci hasta 1959 senesi doğğan ve Saq hastahanesinde qara ciger tsirozınen yatqan edi. Soñra koronavirusı qayd etildi, Saq hastahanesiniñ bölügi observatsiyağa qapatıldı. Ölüm sebeplerinen bağlı tedqiqat keçirile», – dep ayttı Romanovskaya.
Qırımda mayısnıñ 12-nde yedi yañı koronavirus hastası qayd etildi, aralarında Rospotrebnadzor hadimi bar.
Qırımnıñ Rusiye akimiyeti bildirgenine köre, mayısnıñ 12-nden itibaren mecburiy qoruv maskalarını taquv rejimi kirsetile, Qırımda özüni izolâtsiya etüv rejimi mayısnıñ 31-ne qadar uzatıldı, Aqyarda – mayısnıñ 17-ne qadar.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
