Rusiye FVN-niñ Qırım idaresi oktâbr 21-isinde yaramay ava şaraiti sebebinden furtuna ihtarını ilân etti.
"Oktâbr 21-22 Qırımnıñ orta ve şarqiy rayonlarında yüksek yanğın telükesi qalacaq", - denile beyanatta.
Bundan evel de Qırımda yüksek yanğın telükesi rejimi edi.
Bundan sebep, yanğın telükesi olğan vaqıtta ateş yaqmaq, manğal ve patlav aletleri qullanmaq, yanğan sernik taşlamaq ve terek tübündeki otlarnı yaqmaq yasaq. Bundan ğayrı, orman alanlarında ve dağda sigaret içmek, yanğan sernik ve sigaretlerni taşlamaq, küneşli yerde şişe, cam parçalarını ve başqa çöplükni qaldırmağa yasaqlana.
Yılnıñ başından berli Qırımda umumen 4254 yanğın söndürildi, 62 adam elâk oldı, 751 adam tahliye etildi, 93 adam qurtarıldı. Qurtarıcılar, keçken yılğan köre, yanğınlarda zarar körgen adamlarnıñ sayısı 60%-ga arttı, dep bildire.
