Qırımda COVID-19 şübhesi sebebinden tibbiy közetüv alttında bulunğan insanlarnıñ sayısı eksilmey. Bu aqta Qırımnıñ Rusiye ükümeti baş nazir muavini Yelena Romanovskaya mayısnıñ 22-nde koronavirus yuqunçına qarşı küreş operativ ştabınıñ toplaşuvında bildirdi.
«2017 insan közetüv altında buluna, olarnıñ sayısı eksilmey. 1042 kişi evde, 294 insan hastahanede ve 681 kişi observatorlarda qala», – dep bildirdi Romanovskaya.
Onıñ qayd etkenine köre, dört hasta ağır alda buluna.
Qırımda mayısnıñ 22-nde 10 yañı koronavirus hastası qayd etildi.
Qırımnıñ Rusiye akimiyeti malümatına köre, bugünge qadar 324 yañı koronavirus hastası qayd etildi. 25-i çetelden keldi, 32-si Rusiyeden keldi. 130 kişi tüzeldi, 9 koronavirus hastası vefat etti. Aqyarda 148 yañı koronavirus hastası qayd etildi, eki kişi vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
