Qırımnıñ Rusiye mahkemesi Rusiye quvetçileri tarafından "devletke qarşılıq kösterüvde" ve "casuslıqta" qabaatlanğan erkek ve qadınğa üküm çıqardı. Bu aqta Qırımnıñ Rusiye prokuraturasınıñ matbuat hızmeti haber ete.
Qayd etilgenine köre, erkek "mahsus arbiy operatsiyanıñ" keçirilmesine qarşı çıqıp, 2024 senesinden başlap SBU ile alâqada bulunğan.
"O, kuratordan Yalta şeerinde yerleştirilgen silâ ve arbiy tehnika aqqında malümat bermek vazifesini aldı. Bu qanunsız faaliyetke aqay ömür arqadaşını celp etti. 2024 senesi Oraqta genç adam arbiy tehnikanı fotoğa çekti, apayı ise arbiy gemilerni videoğa çekti", — dep bildire Rusiye prokuraturası.
Cenk şaraitlerinde Rusiye quvetçileri tarafından seslendirilgen versiyanıñ doğrulığını tasdıqlamaq imkânsız. Erkek ve qadınnıñ adlarını nazirlik bildirmey, olarnıñ açıq izaatları da yoq. Mahkeme aqaynı devletke qarşı cinayet işlegeninde qabaatlap, 17 yılğa, qadınnı ise casuslıq yapqanında qabaatlap, 15 yılğa apiske aldı.
Rusiyede ve onıñ tarafından işğal etilgen topraqlarda quvetçiler Ukrayina tarafdarlarını taqip eteler. Rusiye tarafdarı Qırımlı bloger Aleksandr Talipov öz telegram kanalında Ukrayinağa qoltutqan Qırımlılarnıñ şahsiy malümatlarını derc ete. Böyle şikâyetlerniñ neticesinde Qırımlılar tutula ve Rusiye ordusını "diskreditasiya" içün memuriy ve cinaiy mesüliyetke çekile.