Rospotrebnadzor mütehassısaları, koronavirus mikrobını teşkermek içün deñizden, havuzlardan ve suv parklarından alınğan suvnıñ talili yapıp başladı. Şimdilik müsbet neticeler yoq, dey Qırımdaki Rospotrebnadzornıñ başı Natalya Penkovskaya.
"İyül ayından başlap biz deñiz suvunda, akvaprklarnıñ suvunda, havuzlarda ve ilâhre koronavirus mikrobınıñ bar ya da yoq olmasını teşkerip başladıq. Bugünde-bugün bu saa müsbet neticeler yoq", - yazdı Penkovskayanıñ sözlerinde TASS agentligi.
O qayd etti ki, Qırım ve Aqyarda hastalıqnıñ "keskin" yayılması yoq.
"Diqqat ayırmaq isteyim ki, cemmat yerlerinde maska rejimine uymalı, sotsial mesafeni unutmamalı, mart ayından berli aytqan şeylerimizni hatırlamalı", - qoştı Penkovskaya.
Tünevin Qırımda 23 yañı koronavirus infektsiya adisesi qayd etildi. Aqyarda - üç.
Umumen, Qırım akimiyetiniñ malümatına köre, Qırımda 1139 COVID-19 hastası qayd etildi, Aqyarda - 339.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
